Mančester siti zaostaje 14 bodova za Liverpulom i nema baš velike šanse za treću uzastopnu titulu prvaka Engleske. Pep Gvardiola (Guardiola) navikao je na uspjehe, a o tome je za britanske medije govorio Čavi Hernandez (Xavi), čovjek koji je s Gvardiolom kao trenerom imao velike uspjehe u Barceloni.

- Pep je rođeni pobjednik. Znam da ga boli to što zaostaje za Liverpulom u ligi. Ipak, on će biti realan, pa će pokušati stvari okrenuti u drugom smjeru. Mislim da postoji velika vjerovatnost da će dati prednost Ligi prvaka. To će biti dvije velike utakmice protiv Real Madrida i možda će odmarati igrače prije tih utakmica – naglasio je Čavi.